Johannes Rau

Dr Johannes Rau (* 16. Jänner 1931 z Wuppertal; † 27. Jänner 2006 z Berlin) isch e dytsche Bolitiker (SPD) gsii. Är isch vu 1999 bis 2004 dr acht Bundesbresidänt vu dr Bundesrepublik Dytschland gsii.

Vorhär isch er Kommunal-, Landes- un Bundesbolitiker gsii. Vu 1969 bis 1970 isch er Oberburgermaischter vu dr Stadt Wuppertal gsii, vu 1977 bis 1998 Landesvorsitzer vu dr SPD z Nordrhy-Weschtfale un vu 1978 bis 1998 dr sechst Minischterbresidänt vum Land Nordrhy-Weschtfale. Bi dr Bundesdagswahl 1987 isch er Chanzlerkandidat vu dr SPD gsii. Noch em Ruggdritt vum Björn Engholm het er kommissarisch dr Vorsitz vu dr SPD-Bundesbartei gfiert.

Dr Johannes Rau isch syt em 9. Augschte 1982 ghyrote gsii mit dr Christina Delius (* 1956), ere Änkeldochter vum friejere Bundesbresidänt Gustav Heinemann. Us dr Eh sin drei Chinder firigange, d Anna Christina (* 19. Dezember 1983), dr Philip Immanuel (* 28. Januar 1985) un d Laura Helene (* 10. November 1986).